ब्रेकिंग

क्रीडा

आयपीएलच्या इतिहासात एकाच षटकात तीन खेळाडू धावबाद

Wrutuja pandharpure
15 Apr 2025

नवी दिल्‍ली : आयपीएल २०२५ च्या २९व्या सामन्यात मुंबई इंडियन्सने दिल्ली कॅपिटल्सचा १२ धावांनी पराभव केला. या सामन्यात मुंबई इंडियन्सने प्रथम फलंदाजी करत २० षटकांत पाच गडी गमावून २०५ धावा केल्या. लक्ष्याचा पाठलाग करताना करुण नायर आणि अभिषेक पोरेल यांनी दिल्ली कॅपिटल्सला चांगली सुरुवात करून दिली. पण कर्ण शर्माने तीन विकेट्स घेत मुंबईला पुन्हा सामन्यात आणले. मात्र, शेवटच्या दोन षटकांमध्ये दिल्लीला जिंकण्यासाठी फक्त २३ धावांची आवश्यकता होती आणि असे वाटत होते की दिल्ली हा सामना सहज जिंकेल. पण बुमराहच्या षटकात धावबाद झालेल्या हॅटट्रिकने सामन्याचा संपूर्ण मार्गच बदलून टाकला.

दिल्ली कॅपिटल्सला शेवटच्या तीन षटकांत जिंकण्यासाठी ३९ धावांची आवश्यकता होती. १८व्या षटकात सँटनरच्या पहिल्या दोन चेंडूंवर एक षटकार आणि एक चौकार मारून विप्राजने १० धावा केल्या. तिसर्‍या आणि चौथ्या चेंडूवर एकेरी धावा आल्या. पाचव्या चेंडूवर विप्राज निगम धावबाद झाला. त्याने ८ चेंडूत १४ धावा केल्या. दिल्लीला शेवटच्या दोन षटकांत जिंकण्यासाठी आणखी २३ धावांची आवश्यकता होती. बुमराह डावाच्या १९व्या षटकात गोलंदाजी करण्यासाठी आला आणि आशुतोष शर्मा स्ट्राईकवर होता, त्याने पहिल्या चेंडूवर एकही धाव घेतली नाही. यानंतर, आशुतोषने दुसर्‍या आणि तिसर्‍या चेंडूवर चौकार मारला. दोन चौकार मारल्यानंतर, दिल्लीला ९ चेंडूत १५ धावांची आवश्यकता होती.

१९व्या षटकाच्या चौथ्या चेंडूवर, दोन धावा घेण्याच्या प्रयत्नात आशुतोष धावबाद झाला. पुढच्याच चेंडूवर (पाचव्या चेंडूवर) कुलदीप यादवसोबतही असेच काहीसे घडले. दोन धावा चोरण्याच्या प्रयत्नात कुलदीपही धावबाद झाला. बुमराहच्या षटकाच्या शेवटच्या चेंडूवर, मोहित शर्मा देखील धाव घेण्याच्या प्रयत्नात धावबाद झाला. मोहित बाद होताच दिल्लीचा संघ १९ षटकांतच सर्वबाद झाला आणि मुंबईने १२ धावांनी सामना जिंकला. आयपीएलच्या इतिहासात एकाच षटकात तीन खेळाडू धावबाद होण्याची ही दुसरी वेळ आहे. मात्र, सलग तीन चेंडूंवर तीन फलंदाज धावबाद होण्याची ही पहिलीच वेळ आहे.