इस्लामाबाद : विमानतळाची सुरक्षा वाढवण्यासाठी विशेष प्रशिक्षण देण्यासाठी युरोपियन नागरी हवाई वाहतूक पथक पुढील आठवड्यात पाकिस्तानच्या दौर्‍यावर जाणार आहे.

युरोपियन युनियनच्या निर्देशानुसार पाठवण्यात येणारे हे दोन सदस्यांचे पथक इस्लामाबाद विमानतळावर हवाई सुरक्षा रक्षकांना प्रशिक्षण देणार आहे. विशेषत: एक्सप्लोसिव्ह ट्रेस डिटेक्शन आणि एक्सप्लोसिव्ह डिटेक्शन डॉग्स या क्षेत्रांमध्ये आंतरराष्ट्रीय मानकांची पूर्तता करण्यावर या सत्रांमध्ये लक्ष केंद्रित केले जाईल. नागरी हवाई वाहतूक प्राधिकरणाच्या प्रवक्त्याने पुष्टी केली की, या उपक्रमाचा उद्देश पाकिस्तानच्या हवाई वाहतूक सुरक्षा प्रोटोकॉलला जागतिक स्तरावर मान्यताप्राप्त मानकांशी संरेखित करणे आणि एकूणच विमानतळ सुरक्षा वाढविणे आहे. सुरक्षेच्या कारणास्तव युरोपला जाण्यास बंदी घालण्यात आलेल्या पाकिस्तान इंटरनॅशनल एअरलाइन्सवरील बंदी गेल्या वर्षी उठवण्यात आली होती. त्यानंतर खासगी पाकिस्तानी एअरलाइन एअरब्लूला युरोपमध्ये उड्डाणे चालविण्यास परवानगी दिली. पाकिस्तानच्या हवाई वाहतूक क्षेत्रासाठी हा मैलाचा दगड होता. २०२० मध्ये घातलेल्या बंदीनंतर पाकिस्तान आणि युरोपियन देशांदरम्यान थेट हवाई संपर्क पूर्ववत झाला आहे, असे अहवालात म्हटले आहे. मात्र, अन्य पाकिस्तानी विमान कंपन्यांना ब्रिटनमध्ये उतरण्यास बंदी घालण्यात आली आहे. विमानसेवा पुन्हा सुरू करण्याची परवानगी मिळावी, यासाठी पाकिस्तानी अधिकारी प्रयत्नशील आहेत.