ब्रेकिंग

विदेश

पंतप्रधान मोदींकडून माहो ओमानथाई रेल्वे मार्गाचे उद्घाटन

Samruddhi Dhayagude
07 Apr 2025

कोलंबो : श्रीलंका दौर्‍याच्या शेवटच्या दिवशी पंतप्रधान नरेंद्र मोदी यांनी माहो ओमानथाई रेल्वे मार्गाचे उद्घाटन केले आणि बौद्ध तीर्थस्थळ अनुराधापुरा येथे सिग्नल यंत्रणेची पायाभरणी केली.यावेळी मोदींनी श्रीलंकेचे अध्यक्ष अनुरा कुमार दिसानायके यांच्यासमवेत रेल्वेला हिरवा झेंडा दाखवला.

श्रीलंकेच्या सरकारने माहो ओमानथाई या रेल्वे मार्गाचे आधुनिकीकरण आणि सुधारणा करण्यासाठी अनेक प्रकल्प सुरू केले आहेत.भारतीय सार्वजनिक क्षेत्रातील कंपनी, इरकॉन इंटरनॅशनल लिमिटेड या विभागाचा विकास करत आहे. या प्रकल्पासाठी भारताने २७२० कोटी रुपये कर्ज दिले आहे. हा रेल्वे मार्ग श्रीलंकेतील माहो जिल्हा आणि ओमानथाई जिल्हा यांच्यातील उत्तर रेल्वे मार्गाचा १२८ किमी लांबीचा भाग आहे. तो श्रीलंकेतील कुरुणेगाला, अनुराधापुरा आणि वावुनिया जिल्ह्यातून जातो.दरम्यान, मोदींनी अनुराधापुरा येथील जयश्री महाबोधी मंदिरालाही भेट दिली. मंदिरात बौद्ध भिक्षूंसोबत आरतीही केली.

१४ भारतीय मच्छिमारांची सुटका

पंतप्रधान नरेंद्र मोदी यांच्या आवाहनानंतर श्रीलंकेने १४ भारतीय मच्छिमारांची सुटका केली आहे. मच्छिमारांच्या सुटकेबाबत पंतप्रधानांनी काल दिसानायके यांच्याशी चर्चा केली होती. तीन दिवसांचा श्रीलंका दौरा पूर्ण करून मोदी भारताकडे रवाना झाल्यानंतर या मच्छिमारांची सुटका करण्यात आली.