ब्रेकिंग

चेटीचंड महोत्सवातून घडले सिंधी संस्कृतीचे दर्शन

Wrutuja pandharpure
05 Apr 2025

पुणे : ’आयो लाल झुलेलाल’ या जयघोषात भगवान साई झुलेलाल यांची भक्तीभावाने केलेली आरती... झुलेलाल यांच्या मनमोहक प्रतिमेचे पूजन... सिंधी गीतांची बहारदार मैफल, कलात्मक नृत्याविष्कार, चाट-सामोसा-गोड भाताचा प्रसाद, साई झुलेलाल यांचे ’लाल झुले लाल झुले लाल झुलेलाल’ हे अखंड भजन अशा वातावरणात सिंधी संस्कृतीचे दर्शन घडले.

सिंधी समाजाचे नवीन वर्ष व भगवान साई झुलेलाल यांच्या १०७५ व्या जन्मोत्सवानिमित्त सिंधू सेवा दलातर्फे ‘चेटीचंड’ महोत्सव आयोजिला होता. येरवड्यातील डेक्कन कॉलेजच्या बँक्वेट हॉल व मैदानावर झालेल्या या महोत्सवात सहभागी प्रत्येक सिंधी भाषकांच्या चेहर्‍यावर आनंद दिसत होता. भगवान साई झुलेलाल यांच्या प्रतिमेचे पूजन करून सामाजिक आणि सांस्कृतिक महोत्सवाची सुरुवात झाली.मुंबईतील प्रसिद्ध गायक शुभम नाथानी, प्रियांशी कर्वाणी, रीतिका सुंदरानी, अमान सुंदरानी यांच्यासह १७ गायक कलाकारांसह देवांश एंटरटेनमेंट प्रस्तुत सिंधी सिम्फनी बँड, सिंधी ऑर्केस्ट्राचा लाईव्ह कॉन्सर्टने उपस्थितांची मने जिंकली. जनरेशन नेक्स्ट डान्स अ‍ॅकॅडमीतर्फे आकर्षक नृत्यकलेचे सादरीकरण झाले. पुणे, पिंपरी-चिंचवड व परिसरातील चार-साडेचार हजार सिंधी भाषक या महोत्सवात सहभागी झाले.

मिलेनियम सेमीकंडक्टर्स इंडियाचे संस्थापक व व्यवस्थापकीय संचालक हरेश अभिचंदानी यांच्या हस्ते साई झुलेलाल यांची महाआरती झाली. सिंधू सेवा दलाचे अध्यक्ष अशोक वासवानी, संस्थापक सदस्य ईश्वर कृपलानी, माजी अध्यक्ष मनोहर फेरवानी, सुरेश जेठवानी, पीटर दलवानी, दीपक वाधवानी, विजय दासवानी, पुरुषोत्तम पर्यानी, सचिन तलरेजा, राजेंद्र फेरवानी, निलेश फेरवानी, देवेंद्र चावला, जय पिंजानी आदी उपस्थित होते.अशोक वासवानी म्हणाले, सिंधी संस्कृती विषयी लोकांमध्ये जागरूकता निर्माण करण्यासह सिंधी परंपरा अधिकाधिक लोकांपर्यंत पोहचविण्यासाठी सिंधू सेवा दल गेली ३८ वर्ष कार्यरत आहे.