ब्रेकिंग

अर्थ

शेअर बाजारात हाहाकार; १,३९० अंकांची पडझड

Wrutuja pandharpure
02 Apr 2025

मुंबई : अमेरिकेतील ट्रम्प प्रशासन आज (बुधवार) पासून भारतासह अनेक देशांवर वाढीव आयात शुल्क लागू करत आहे. त्याचे पडसाद मंगळवारी शेअर बाजारात उमटले. मुंबई शेअर बाजाराचा निर्देशांक १,३९० अंकांनी कोसळला. आयटी आणि खासगी बँकांचे समभाग विशेषतः घसरले. दुसरीकडे, राष्ट्रीय शेअर बाजाराचा निफ्टी ३५३.६५ अंकांनी घसरला.अमेरिकेचे अध्यक्ष डोनाल्ड ट्रम्प यांच्या निर्णयाने जगभरातील गुंतवणूकदारांमध्ये मोठी चिंता आणि भीती आहे. त्याचे पडसाद काल बाजारात उमटले. नवीन आर्थिक वर्षाची सुरूवात काल मुंबई शेअर बाजारात विक्रीच्या मार्‍याने झाली. यात गुंतवणूकदारांचे ३.४९ लाख कोटींचे नुकसान झाले.

मुंबई शेअर बाजाराचा निर्देशांक काल १.८० टक्के म्हणजे १,३९०.४१ ने घसरून ७६,०२४.५१ वर स्थिरावला. मुख्य ३० पैकी २८ कंपन्यांचे समभाग कोसळले. सत्रांतर्गत निर्देशांक १.९४ टक्के म्हणजे १,५०२.७४ अंकांनी घसरुन ७५,९१२.१८ पर्यंत खाली आला होता. अखेरच्या सत्रात तो काहीसा सावरला. दुसरीकडे, निफ्टी १.८० टक्के म्हणजे ३५३.६५ अंकांनी घसरुन २३,१६५.७० वर स्थिरावला.अमेरिकेच्या बाजारावर अवलंबून असलेल्या आयटी कंपन्यांचे समभाग काल १.८ टक्क्यांनी घसरले.

यासोबतच, खासगी बँकांचेही समभाग घसरले. काल एचसीएल टेक, बजाज फिनसर्व्ह, एचडीएफसी बँक, बजाज फायनान्स, इन्फोसिस, टायटन, आयसीआयसीआय बँक, सन फार्मा, रिलायन्स इंडस्ट्रीज, लार्सन अँड टुब्रो, टेक महिंद्रा आणि एनटीपीसी सर्वात जास्त पिछाडीवर होते. दरम्यान, आंतरराष्ट्रीय बाजारात खनिज तेलाचे दर ०.१२ टक्क्यांनी वाढून ७४.८६ डॉलर प्रति पिंपवर पोहोचले. शुक्रवारी निर्देशांक १९१.५१ अंकांनी घसरुन ७७,४१४.९२ वर स्थिरावला होता. तर, निफ्टी ७२.६० अंकांनी घसरून २३,५१९.३ वर बंद झाला होता.