ब्रेकिंग

विदेश

टोंगात भूकंप; त्सुनामीचा इशारा

Samruddhi Dhayagude
01 Apr 2025

नुकू’आलोफा : पॅसिफिक महासागरातील टोंगा बेटांवर रविवारी ७.१ तीव्रतेच्या भूकंपाच्या धक्के बसले. भूकंपानंतर या भागात त्सुनामीचा इशारा जारी करण्यात आला आहे, अशी माहिती यूएस जिओलॉजिकल सर्व्हेने (यूएसजीएस) दिली आहे.यूएसजीएसने दिलेल्या माहितीनुसार, टोंगाच्या मुख्य बेटापासून उत्तर पूर्वेला एक हजार किलोमीटर अंतरावर या भूकंपाचे केंद्र होते. पॅसिफिक त्सुनामी वॉर्निंग सेंटरने इशारा दिला आहे, की भूकंपाच्या केंद्रापासून ३०० किलोमीटर अंतरावरील किनारपट्टीवर धोकादायक लाटांचा परिणाम दिसू शकतो.

या भूकंपामुळे टोंगाच्या किनारपट्टीवर भूकंपाच्या केंद्रापासून ३०० किलोमीटर पर्यंत धोकादायक त्सुनामी लाटा येण्याची शक्यता आहे, असे अमेरिकेच्या त्सुनामी वॉर्निंग सिस्टिमने म्हटले आहे. दरम्यान या शक्तिशाली भूकंपानंतर झालेल्या नुकसानीची अद्याप कोणतीही माहिती समोर आली नाही. तर जर्मन रिसर्च सेंटर फॉर जिओसायन्सेसने हा भूकंप १० किमी खोलीवर झाला असल्याचे म्हटले आहे.

टोंगा हे पॉलिनेशियन देश असून, ज्यात १७० बेटांचा समावेश आहे. तसेच या देशाची लोकसंख्या जेमतेम १० लाखांपेक्षा अधिक आहे. यापैकी बहुतांश नागरिक हे टोंगाटापू या मुख्य बेटावर राहातात. हा देश ऑस्ट्रेलियाच्या किनार्‍यापासून तीन हजार ५०० किलोमीटर अंतरावर पूर्वेस येतो.