ब्रेकिंग

देश

जम्मू-काश्मीरमधील कठुआमध्ये चकमक

Wrutuja pandharpure
28 Mar 2025

दोन दहशतवादी ठार; पाच जवान जखमी

कठुआ : जम्मू-काश्मीरमधील कठुआ जिल्ह्यात झालेल्या चकमकीत दोन दहशतवादी ठार झाले, तर पाच जवान जखमी झाले. अधिकार्‍यांनी गुरुवारी ही माहिती दिली. सुमारे पाच दहशतवाद्यांचा गट असून, यातील तीन जणांचा शोध सुरू असल्याचेही अधिकार्‍यांनी स्पष्ट केले.

चकमकी दरम्यान जोरदार गोळीबार आणि बॉम्ब हल्ले झाले. राजबागच्या घाटी जुठान भागातील जाखोले गावाजवळ झालेल्या या चकमकीत सुमारे पाच दहशतवाद्यांचा समावेश आहे. सुरुवातीच्या गोळीबारात विशेष पोलीस अधिकारी भरत चलोत्रा जखमी झाले असून त्यांच्या चेहर्‍यावर जखमा झाल्या आहेत. कठुआ येथील रुग्णालयात उपचारानंतर त्यांना जम्मूच्या सरकारी वैद्यकीय महाविद्यालय रुग्णालयात हलवण्यात आले असून, प्रकृती स्थिर असल्याचे सांगण्यात येत आहे. लष्कर, बीएसएफ आणि सीआरपीएफच्या मदतीने जम्मू-काश्मीर पोलिसांच्या स्पेशल ऑपरेशन्स ग्रुपने (एसओजी) केलेल्या हल्ल्यात दोन दहशतवादी ठार झाल्याचे अधिकार्‍यांनी सांगितले. दरम्यान, एका उपविभागीय पोलिस अधिकार्‍यासह तीन सुरक्षा कर्मचारी चकमकीच्या ठिकाणी अडकले आहेत. चकमक संपल्यानंतरच स्पष्ट चित्र समोर येईल, असे अधिकार्‍यांनी सांगितले.