मुंबई, (प्रतिनिधी) : उपमुख्यमंत्री एकनाथ शिंदे यांच्यावर विडंबनात्मक गाण्यातून टीका करणारा कुणाल कामरा आणि तेच गाणे, त्याच चालीवर बोलून दाखविणार्‍या ठाकरे गटाच्या उपनेत्या सुषमा अंधारे यांच्याविरुद्ध भाजपचे गटनेते प्रवीण दरेकर यांनी बुधवारी विधानपरिषदेत हक्कभंग दाखल केला. सभापती राम शिंदे यांनी हक्कभंगाची सूचना दाखल करून घेत पुढील कारवाईसाठी विशेषाधिकार समितीकडे पाठवित असल्याचे घोषित केले. विधानसभेतही शिवसेनेचे रमेश बोरनारे यांनी हा हक्कभंग प्रस्ताव मांडला.उपमुख्यमंत्री शिंदे यांच्यावर कुणाल कामरा याने व्यंगात्मक गाणे सादर केल्यानंतर शिवसैनिकांनी स्टुडिओची तोडफोड केली. त्याचे पडसाद विधिमंडळाच्या दोन्ही सभागृहात उमटले होते. मात्र, कामराच्या गाण्याचे शिवसेनेकडून (ठाकरे) समर्थन करण्यात आले होते. ठाकरे गटाच्या नेत्या सुषमा अंधारे यांनी तर कामरा याचे समर्थन करताना ते गाणे माध्यमांसमोर म्हणून दाखवले होते. भाजपचे गटनेते प्रवीण दरेकर यांनी सुषमा अंधारे यांच्या विधानाचा दाखला देत, अंधारे आणि कामरा यांच्या विरोधात विधान परिषदेत हक्कभंग मांडला. अंधारे यांनी आपल्या निवेदनात संस्कृती आणि शाब्दिक मर्यादांचे उघडपणे उल्लंघन करताना, आपण राज्याच्या उपमुख्यमंत्र्यांविषयी बोलत आहोत, याचे भानही ठेवले नाही. उपमुख्यमंत्री पदावर असलेल्या व एका राजकीय पक्षाच्या प्रमुखाविषयी सोशल मीडियाच्या माध्यमातून अशा प्रकारे भाष्य करणे अयोग्य आहे. त्यामुळे अंधारे यांनी वापरलेली खालच्या पातळीवरील भाषा आणि कुणाल कामराने हेतूपूरस्पर उपमुख्यमंत्री यांच्यावर वैयक्तिक व उपरोधिक केलेले गाणे यातील भाषा एकप्रकारे सभागृहाचा अवमान करणारी आहे, असे सांगतानाच आपण मांडलेला हक्कभंग दाखल करून घेण्याची मागणी दरेकर यांनी केली. त्यावर, सभापती राम शिंदे यांनी हे प्रकरण विशेषाधिकार समितीकडे योग्य त्या कारवाईसाठी पाठवीत असल्याचे जाहीर केले.