ब्रेकिंग

टिळक विद्यापीठात नेत्र तपासणी शिबिर

Wrutuja pandharpure
23 Mar 2025

पुणे : टिळक महाराष्ट्र विद्यापीठ पुणे कर्मचारी कल्याण समिती आणि पुणे अंध जन मंडळ संचलित एच व्ही देसाई नेत्र रुग्णालयाच्या वतीने शनिवार दि. २२ रोजी विद्यापीठाच्या गुलटेकडी येथील आवारात मोफत नेत्र तपासणी आणि मोफत मोतीबिंदू शस्त्रक्रिया शिबिर आयोजित केले होते. टिमविचे कर्मचारी आणि परिसरातील नागरिक असे १५० पेक्षा अधिक पुरुष आणि महिलांनी या शिबिरात डोळे तपासणी केली.

या शिबिरात ज्यांच्या डोळ्यांमध्ये मोतीबिंदू आढळला त्यांच्यासाठी सोमवार दि. २४ रोजी एचव्ही देसाई रुग्णालयाच्या वतीने मोतीबिंदूची शस्त्रक्रिया मोफत केली जाणार आहे. या नेत्र तपासणी शिबिराचे उद्घाटन विद्यापीठाच्या कुलगुरू डॉ. गीताली टिळक यांच्या हस्ते झाले. याप्रसंगी त्या बोलत असताना प्रत्येकाने आपल्या डोळ्यांची काळजी घेणे आवश्यक असल्याचे त्यांनी नमूद केले.

कर्मचारी कल्याण समितीचे डॉ.प्रवीण जाधव, डॉ. कार्तिकी सुबकडे, सहाय्यक प्राध्यापिका रीना भाटी, पल्लवी जोशी आणि ऋषिकेश केळकर यांनी शिबिर यशस्वी करण्यासाठी सहकार्य केले. या प्रसंगी विद्यापीठाच्या प्रभारी कुलसचिव डॉ. सुवर्णा साठे, सचिव अजित खाडीलकर, तसेच एचव्ही देसाई नेत्र रुग्णालय यांचे मंगेश कुलकर्णी आणि नेत्र रुग्णालयाचे सर्व कर्मचारी उपस्थित होते.