ब्रेकिंग

गुन्हेगारी जगत

गांज्याचा चोरटा व्यापार करणार्‍या तिघांना अटक

Wrutuja pandharpure
23 Mar 2025

लोणी काळभोर, (वार्ताहर) : लोणी काळभोर येथील माळीमळा परिसरातील राजेंद्र भोजनालय समोर गांजाची विक्री करण्यासाठी आलेल्या तिघांना लोणी काळभोर पोलिसांनी अटक केली आहे. त्यांच्याकडून १९ हजार रुपये किंमतीचा ९३० ग्रॅम गांजा जप्त केला आहे. पोलिसांनी ही कारवाई लोणी काळभोर ग्रामपंचायत हद्दीतील माळी मळा परिसरात शुक्रवारी (ता. २१) रात्री ९ वाजण्याच्या सुमारास केली आहे.

शुभम बानु पालखे (वय-२२, रा. दत्तमंदिर जवळ, १५ नंबर, जुना कॅमल शेजारी, हडपसर, पुणे), मयुर विलास बोरकर (वय- २५, रा. सर्वे नंबर ५. वेताळबाबा वसाहत, ग्लायडींग सेंटर जवळ, हडपसर, पुणे) व अमन महंमद रफिक कोतवाल वय- २७, रा. विठ्ठल मंदिराजवळ, माळवाडी, हडपसर, पुणे) अशी अटक करण्यात आलेल्या आरोपींची नावे आहेत. याप्रकरणी पोलिस हवालदार प्रदीप क्षीरसागर यांनी लोणी काळभोर पोलीस ठाण्यात फिर्याद दिली

पोलिस हवालदार प्रदीप क्षीरसागर हे शुक्रवारी रात्री ८:०० वाजण्याच्या सुमारास लोणी काळभोर पोलीस ठाण्याच्या हद्दीत गस्त घालत होते. पोलिसांना माळी मळा परिसरात तिघेजण गांजाची विक्री करण्यासाठी येणार आहेत. अशी माहिती एका खबर्‍या मार्फत मिळाली होती. मिळालेल्या माहितीच्या अनुषंगाने पोलिसांनी संबंधित ठिकाणी सापळा रचून तीन संशयितांना ताब्यात घेतले. आरोपींची झडती घेतली असता, त्यांच्याकडील एका पिश़वी मध्ये १९ हजार रुपयांचा ९३० ग्रॅम वजन असलेला गांजा मिळून आला.