ब्रेकिंग

गुन्हेगारी जगत

बस घातपात प्रकरणी चालकावर खुनाचा गुन्हा

Samruddhi Dhayagude
22 Mar 2025

पिंपरी : हिंजवडीतील बस घातपात प्रकरणातील आरोपीवर खुनाचा आणि खुनाचा प्रयत्न केल्याचा गुन्हा दाखल करण्यात आला आहे. जनार्दन निळकंठ हुंबर्डीकर (वय ५४, वारजे, पुणे) असे या आरोपी चालकाचे नाव आहे. याप्रकरणी पोलिस उपनिरीक्षक दत्ता काळे यांनी हिंजवडी पोलिस ठाण्यात फिर्याद दिली आहे. बुधवारी ही घटना घडली होती. मात्र, गुरुवारी शॉर्टसर्कीटमुळे नव्हे तर चालकानेच बस पेटविल्याचे समोर आले. या घटनेत चार कामगारांचा होरपळून मृत्यू झाला. तर, पाच कामगार जखमी झाले.या प्रकरणाचा २४ तासांत उलगडा करण्यात हिंजवडी पोलिसांना यश आले. चालकाने कारस्थान रचून कामगारांना ठार मारल्याचे तपासात समोर आले आहे. त्यामुळे चालकावर खुनाचा आणि खुनाच्या प्रयत्नाचा गुन्हा दाखल करण्यात आला आहे.

जनार्दन याचे इतर कामगारांसोबत सतत भांडण होत. याचा राग त्याच्या मनात होता. तसेच, त्याला अन्यही कामे सांगितली जात होती. त्याचाही राग त्याच्या डोक्यात होता. त्यामुळे त्याने कामगारांना धडा शिकवण्याचे ठरवले. घटनेच्या एक दिवस आधी त्याने कंपनीतील बेंजिम सोल्युशन रसायन आणले होते. हे रसायन कापडावर टाकून त्याने ते बसमध्ये पेटविले होते. त्यानंतर, बसने अचानक पेट घेतला. सुरुवातीला अपघात वाटणार्‍या या प्रकरणात पोलिसांनी तपास करीत हा घातपात असल्याचे उघडकीस आणले आहे. हिंजवडी पोलीस तपास करीत आहेत.