ब्रेकिंग

गुन्हेगारी जगत

तरुणाच्या आत्महत्येप्रकरणी सहा जणांवर गुन्हा दाखल; दोघांना अटक

Wrutuja pandharpure
18 Mar 2025

पिंपरी : एक ऍप्लिकेशनच्या माध्यमातून ओळख झाल्यानंतर सहा तरुणांनी एका तरुणाला पिंपरी येथे भेटण्यासाठी बोलावले. तिथे त्याचे नग्न व्हिडीओ काढून ते व्हायरल करण्याची धमकी देत त्याच्याकडून पैसे घेत त्याला त्रास दिला. या त्रासाला कंटाळून तरुणाने मेट्रो स्टेशनवरून उडी मारून आत्महत्या केली. याप्रकरणी पोलिसांनी सहा जणांच्या विरोधात गुन्हा दाखल केला आहे. त्यातील दोघांना पोलिसांनी अटक केली आहे. सुजल सुनील मनकर (वय २१) असे आत्महत्या केलेल्या तरुणाचे नाव आहे. याप्रकरणी सुजल याचे वडील सुनील मनकर (रा. राजगुरूनगर, खेड) यांनी पिंपरी पोलीस ठाण्यात फिर्याद दिली आहे.

त्यानुसार प्रणव किशोर शिंदे (वय २१), नितीन पाटील (वय २२), संदीप रोकडे (वय २०), आकाश चौरे (वय २०, चौघे रा. महेशनगर पिंपरी. मूळ रा. धुळे), लोपेश राजू पाटील (वय २०, रा. महेशनगर, पिंपरी. मूळ रा. जळगाव), प्रथमेश परशुराम जाधव (वय १९, रा. महेशनगर, पिंपरी. मूळ रा. सातारा) यांच्या विरोधात गुन्हा दाखल करण्यात आला आहे. लोपेश पाटील आणि प्रथमेश जाधव यांना अटक करण्यात आली आहे.

आरोपी सहा जणांनी मिळून एका ऍप्लिकेशनच्या माध्यमातून सुजल याला संपर्क करून महेशनगर पिंपरी येथे बोलावून घेतले. तिथे त्याचे नग्न फोटो आणि व्हिडीओ काढले. ते फोटो आणि व्हिडीओ सोशल मीडियावर व्हायरल करण्याची धमकी देऊन सुजल याच्याकडे ५० हजारांची मागणी केली. त्यातील ३५ हजार ५०० रुपये सुजल याने आरोपींना दिले. मात्र आणखी पैशांची मागणी करत आरोपींनी सुजल याला मानसिक त्रास दिला. या त्रासाला कंटाळून सुजल याने संत तुकाराम नगर मेट्रो स्थानकावरून उडी मारून आत्महत्या केली. पोलिसांनी दोघांना अटक केली आहे. पिंपरी पोलीस तपास करीत आहेत.