ब्रेकिंग

देश

फेसबुकवर मैत्री अन् प्रेमात फसवले ,अन देशाची गोपनीय माहिती पुरवली

Samruddhi Dhayagude
14 Mar 2025

भारताच्या गगनयान मोहिमेची गोपनीय माहिती शत्रूला पुरवली

आग्रा : उत्तर प्रदेशातील दहशतवाद विरोधी पथकाने आग्रा येथील 'ऑर्डिनेंस फॅक्टरी'तून फिरोजाबादच्या रविंद्र कुमार आणि त्यांच्या एका सहकाऱ्याला अटक केली. पाकिस्तानी गुप्तचर संस्था ISI ला गुप्त लष्करी माहिती आणि वैज्ञानिक माहिती पाठवल्याचा त्यांच्यावर आरोप आहे. रविंद्र कुमारला 'हनीट्रॅप'मध्ये अडकवले, ISI च्या महिला एजेंटने सोशल मीडियावर रविंद्रसोबत मैत्री केली, त्यानंतर त्याच्याकडून संवेदनशील माहिती जमा करू लागली. या जाळ्यात रविंद्र कुमार अडकत गेला. आता यूपी एटीएस रविंद्रकडून देशातील आयएसआयच्या नेटवर्कचा शोध घेत आहे.

एटीएसच्या तपासात समोर आले की, रविंद्र कुमारला आयएसआय महिला एजंटने नेहा शर्मा नावाने बनावट खाते उघडून जाळ्यात ओढले. तपासात महिलेने स्वत:ला पाकिस्तानी गुप्तचर यंत्रणेची एजंट असल्याचे सांगितले. त्यानंतर पैशाचे आमिष दाखवून रविंद्रकडून गोपनीय माहिती काढून घेतली. रविंद्रनेही आयएसआयला एजंटला ऑर्डिनेंस फॅक्टरीतील बरीच गोपनीय कागदपत्रे पाकिस्तानला पाठवली. त्यात 'ऑर्डिनेंस फॅक्टरी'चा रोजचा उत्पादन अहवालाचा समावेश आहे. त्याशिवाय 'स्क्रिनिंग कमिटी'ची काही कागदपत्रे आहेत. इतकेच नाही तर ड्रोन, गगनयान प्रोजेक्टबाबतही काही महत्त्वाची माहिती दिली गेली आहे.

मोबाईलमध्ये महत्त्वाची कागदपत्रे

यूपी एटीएसने रविंद्रचा मोबाईल तपासला असता त्यात सैन्य आणि 'ऑर्डिनेंस फॅक्टरी'तील काही गोपनीय कागदपत्रे सापडली. त्यात ५१ गुरखा रायफल्सच्या अधिकाऱ्यांचे आणि 'लॉजिस्टीक ड्रोन'च्या चाचणीची काही माहिती आहे. व्हॉट्सअपच्या माध्यामतून ही संवेदनशील कागदपत्रे शत्रू देश पाकिस्तानला पाठवली होती.

समाज माध्यमांतून जाळ्यात

नेहा शर्मा नावाने पाकिस्तानी महिला एजंटने रविंद्र कुमारशी फेसबुकवर मैत्री वाढवली. दोघांमध्ये फोन नंबरची देवाण घेवाण झाली. त्यानंतर व्हॉट्सअपवर चॅट, ऑडिओ आणि व्हिडिओ कॉलही झाले. हळूहळू महिला एजेंटने रविंद्र कुमारला त्याच्या प्रेमात अडकवले, त्यानंतर भारताशी निगडित गोपनीय माहिती महिला रविंद्र कुमारकडून मिळवू लागली.

या प्रकरणाची गंभीर दखल घेत उत्तर प्रदेश एटीएसने सखोल चौकशीला सुरूवात केली आहे. रविंद्र आणि त्यांच्या संपर्कात असणाऱ्यांचा शोध घेतला जात आहे. तपासावेळी बरेच महत्त्वाचे खुलासे समोर आलेत. त्यामुळे देशातील पाकिस्तानी आयएसआयचा नेटवर्कचा उध्वस्त करण्यास मदत मिळेल.