ब्रेकिंग

देश

राजकोटच्या अटलांटिस इमारतीला भीषण आग, तीन जणांचा होरपळून मृत्यू

Samruddhi Dhayagude
14 Mar 2025

राजकोट : गुजरातच्या राजकोट येथे एक आगीची घटना घडली. राजकोट येथील अटलांटिस इमारतीला आज सकाळी आग लागली. ही आग सहाव्या मजल्यावर सुरूवातीला लागली आणि आगीचा भडका उडाला. या आगीच्या घटनेची माहिती मिळताच अग्निशमन दलाच्या जवानांनी घटनास्थळी धाव घेत आग विझवण्यास सुरुवात केली. सकाळची वेळ असल्याने इमारतीमधील रहिवासी हे घरामध्येच होते. अटलांटिस इमारत ही राजकोटमधील महागड्या इमारतींपैकी एक आहे. मोठ्या सराफी मालकांची घरे याच इमारतीत आहेत.

ही आग शॉर्ट सर्किटमुळे लागल्याची प्राथमिक माहिती आहे. आगीची माहिती मिळल्यानंतर अग्निशमन दल आणि पोलिस अधिकारी घटनास्थळी दाखल झाले आणि मदतकार्यास सुरूवात केली. मात्र, या आगीच्या घटनेत तब्बल तीन जणांचा मृत्यू झालाय. मिळालेल्या माहितीनुसार, १५० फूट रिंग रोडवर असलेल्या अटलांटिस इमारतीच्या सहाव्या मजल्यावर आग लागली होती. ही आग बंद फ्लॅटमध्ये सुरूवातीला लागली.

इमारतीमध्ये आग लागल्याचे कळताच रहिवासी घाबरले. यानंतर लिफ्टकडे धाव घेत बरेच जण खाली पोहोचले. त्यानंतर या घटनेची माहिती ही

अग्निशमन विभाग आणि पोलिसांना देण्यात आली. घटनेची माहिती मिळताच अग्निशमन दलाच्या दहा गाड्या घटनास्थळी दाखल झाल्या. शर्थीचे प्रयत्न करून आगीवर नियंत्रण मिळवण्यात यश मिळाले. अजूनही काहीजण घरामध्ये अडकल्याची माहिती आहे. जखमींवर सध्या रूग्णालयात उपचार सुरू असल्याची माहिती आहे.

या इमारतीमध्ये सराफी दुकानाचे मालक तसेच नामवंत डॉक्टरांचे कुटुंब राहत असल्याची माहिती आहे. आग नेमकी कशी लागली याचा तपास केला जाईल. ही आग सकाळी साधारणपणे १०.३० च्या आसपास लागल्याचे सांगितले जाते. अग्निशमन दलाच्या कर्मचाऱ्यांनी फ्लॅटमध्ये अडकलेल्यांना सुरक्षित खाली उतरवले. आगीच्या घटनेनंतर सर्वत्र धूर धूर दिसत होता. या आगीच्या घटनेचे फोटो आणि व्हिडीओ व्हायरल झाले आहेत.