फलज्योतिषात नेपच्यून या  ग्रहास चंद्र आणि शुक्र यांच्याबरोबरीने संवेदना, भावना, कला आणि प्रेम यांचा महत्त्वाचा कारक ग्रह मानले आहे. नेपच्यूनच्या कारकत्वात संवेदना आणि भावना यांची उच्चतम पातळी दर्शविली जाते. त्यामुळे अभिनव आणि जगावेगळ्या, उत्तमोत्तम कल्पनांचा हा कारक समजला जातो. नेपच्यून ग्रह गूढ आणि अतर्क्य गोष्टी, शास्त्रे आणि घटनांचा महत्वाचा कारक आहे.  भविष्यात घडण्याची शक्यता असलेली किंवा नसलेली घटना मनाला जाणवण्याचे कारकत्व  नेपच्यून या ग्रहाचे आहे. दिव्य दृष्टी,  कोणत्याही कलेचा परमोच्च अविष्कार , प्रेम, वात्सल्य अशा भावनांची पराकोटीची अनुभूती देण्याचे कारकत्व हे नेपच्यून ग्रहाचे आहे. या सप्ताहातील उत्तरार्धात बुध आणि नेपच्यून यांची युती तसेच मंगळ आणि नेपच्यून यांचा त्रिकोणयोग असे दोन महत्वाचे योग होत आहेत.बुधाबरोबर होणारी नेपच्यूनची युती  उत्तम कल्पना, स्फूर्ती आणि अंतःप्रेरणा आणि कुशाग्र बुद्धी देणारी असते. कोणत्याही क्षेत्रात ही युती आपल्या बुद्धीची चमक दाखवू शकते. सप्ताहातील ही युती राहूच्या सान्निध्यात होत असल्याने विसरभोळेपणा, अतिविचार, चिंता, निद्रानाश अशी विपरीत फले देखील प्रकर्षाने अनुभवास येण्याची शक्यता आहे. राहूच्या साथीने होणारी मीन राशीतील ही युती अपकीर्ती करणारी, खोटे आळ आणणारी किंवा विशिष्ट कागदपत्रांमुळे मनस्ताप देणारी राहील.  मंगळ आणि नेपच्यून यांचा त्रिकोणयोग सखोल चिंतन, मनन आणि उल्लेखनीय स्मरणशक्ती देणारा आहे. एखाद्या कलेत किंवा छंद जोपासण्यासाठी हा त्रिकोणयोग प्राविण्य देऊ शकतो. तरल भावनांच्या प्रभावात अशा व्यक्तीची  इतरांना अडचणींच्या काळात मदत करण्याची प्रवृत्ती असते. सप्ताहात  वृषभ, मिथुन, कन्या आणि कुंभ या राशींना या दोन्ही ग्रहयोगांची शक्ती सकारात्मकता देणारी आणि कलाप्राविण्य देणारी ठरेल. इतर राशींसाठी नैराश्य, फसवणूक आणि नकारात्मकता यांचे प्राबल्य अधिक राहील. 

 

मेष-करमणुकीमुळे ताण दूर होतील

 

सांंसारिक अपेक्षापूर्तीने समाधान वाढेल. पती-पत्नीतील सुसंवादामुळे सप्ताहाच्या प्रारंभी कुटुंबातील वातावरण चैतन्यमय राहील. घरातील इतर सदस्यांची नाराजी दूर करण्याचा प्रयत्न करा. स्वतःच्या पचन क्रियेसंबंधी असणार्‍या काही तक्रारींच्या निवारणार्थ वैद्यकीय सल्ला घ्यावा लागेल. करमणुकीमुळे तात्कालिक मानसिक ताण तणाव दूर होण्यासाठी मदत होईल. मानसिक चंचलतेमुळे दैनंदिन जीवनातील निर्णय चुकण्याची शक्यता आहे. सप्ताहाच्या उत्तरार्धात गूढ आणि आध्यात्मिक साहित्याची आवड निर्माण होईल.

 

वृषभ-साधकांना गुरुकृपेचा लाभ 

 

सप्ताहाचा प्रारंभ कृतीशील राहील. कठीण आव्हाने पेलून स्वतःची कार्यक्षमता सिद्ध कराल. विरोधक अवाक् होतील. नोकरीत किंवा उद्योगात  मान वाढेल असे कार्य तुमच्या हातून होईल. धर्म कृत्ये आणि  श्रद्धा तुमच्या सात्विक वृत्तीत भर घालतील. मोठे आणि महत्त्वाचे निर्णय घेताना अंतर्मनाचा कौल उपयोगी पडेल. अध्यात्मिक साधकांना गुरुकृपा लाभेल. लेखन, संशोधन आणि तत्सम बौद्धिक क्षेत्रात विशेष कर्तृत्व करण्याची संधी प्राप्त होईल. सप्ताहाच्या शेवटी मानसिक संतुलन आणि अतीसंवेदना यावर नियंत्रण ठेवा. 

 

मिथुन-नियमित पौष्टिक आहार घ्या

 

घर आणि व्यवसाय अशा दोन्ही ठिकाणी तुमच्या आग्रही वृत्तीमुळे वादविवाद होण्याची शक्यता आहे. पोटाचे आरोग्य राखण्यासाठी आहारात पौष्टिकता आणि नियमितता ठेवा. खर्चाचे निर्णय घेताना आपल्या निर्णयांचा पुनर्विचार करावा. धनानाशाची शक्यता आहे. व्यवसायिक जीवनातील प्रयत्न आणि परिश्रम वाढवावे लागतील. उत्तरार्धात बौद्धिक क्षेत्रात चातुर्याने कार्यरत रहाणे आवश्यक आहे. भावनांचा अतिरेक टाळायला हवा. सप्ताहाच्या शेवटी भावनाप्रक्षोभ आणि नंतर पश्चात्ताप होण्याची शक्यता आहे.

 

कर्क-सार्वजनिक क्षेत्रात प्रतिष्ठा वाढेल

 

कुटुंबातील कोणाची आरोग्याची चिंता  राहील. दैनंदिन व्यवहारातील यशात सुसंगतीचा महत्वाचा वाटा राहील. राशीतील मंगळ भ्रमण तुमच्या संततीविषयक धोरणातील उणीवांचे  निदर्शक आहे. श्रद्धापूर्वक एखद्या धर्म स्थळाला भेट देण्याचा योग येऊ शकतो. सार्वजनिक क्षेत्रात प्रतिष्ठा वाढवणारे कर्तृत्व घडेल. नोकरीत विरोधक सक्रिय रहातील. विरोधकांना मात देणे सध्यातरी कठीण आहे. साहित्य आणि कला क्षेत्रात वैशिष्ट्यपूर्ण कलाकृतीची निर्मिती होऊ शकते. सप्ताहाच्या शेवटी परोपकाराने समाधान लाभेल.

 

सिंह-आर्थिक स्थैर्यातून आत्मविश्वास 

 

दैनंदिन कामे उत्साहाने पार पाडाल. कौटुंबिक वातावरण प्रेराणादायक राहील. आर्थिक स्थैर्य तुमचा आत्मविश्वास वाढवेल. मंगळ भ्रमण पायासंबंधी दुखणी निर्माण करू शकते. चैन आणि मौजमजा करताना  आरोग्याकडे दुर्लक्ष होऊ देऊ नका. गूढ कथा आणि लेखन याबाबत कुतूहल निर्माण होईल. बौद्धिक ताण घेऊन विशिष्ट उपक्रमांचा पाठपुरावा करणे टाळायला हवे. उत्तरार्धात व्यावसायिक यश प्राप्तीचा अहंकार विपरीत निर्णय घेण्याला प्रवृत्त करेल. सप्ताहाच्या शेवटी चिंता आणि नैराश्याचा प्रभाव राहील. 

 

कन्या-गुरुकृपा लाभेल 

 

सप्ताहाचा प्रारंभ स्वास्थ्यवर्धक असला तरी आपल्या वैवाहिक जोडीदाराच्या मागण्या पुरविणे तुम्हाला कठीण जाईल. व्यावसायिक जीवनात प्रशंसायोग्य कर्तृत्व घडेल. नोकरी आणि उद्योगातील तुमच्या ठाम भूमिकेमुळे विविध आव्हाने  पेलू शकाल. सप्तमातील शनी कर्तव्यापुढे भावना दुय्यम ठरवेल. बुध,नेपच्यून वैचारिक गोंधळ किंवा विसरभोळेपणामुळे भावनिक नुकसान करण्याची शक्यता आहे. धर्म, आध्यात्म आणि योग यांच्या साधकांना अपेक्षित ज्ञानार्जन होणे आणि गुरुकृपा लाभणे शक्य आहे.

 

तूळ- बौद्धिक क्षेत्रात  यश

 

सप्ताहाच्या प्रारंभी कामांचा वेग वाढेल. आर्थिक कामे योग्य पद्धतीने मार्गी लागतील. कौटुंबिक जीवन आनंदाने भरलेले राहील. नोकरी आणि उद्योगात तुमचे आग्रही धोरण, प्रयत्न आणि परिश्रम यांच्या सहाय्याने उद्दिष्टापर्यंत  पोहोचणे शक्य होईल. बौद्धिक क्षेत्रात स्वतःच्या कर्तृत्वाचा ठसा उमटवाल. नोकरीत विरोधक सक्रिय असले तरी तुम्ही वरचढ ठराल. उत्तरार्धात मानसिक संतुलन ढळविणार्‍या घटना घडण्याची शक्यता आहे. भावनांच्या प्रभावात सप्ताहांती अविचारी आणि टोकाचे निर्णय घेणे टाळा.

 

वृश्चिक-अपेक्षित उलाढाल 

 

विविध गुंतवणुकीबाबत तसेच कर्ज मागणी प्रकरणाबाबत चिंता राहतील. शारीरिक आणि मानसिक स्थिती उत्तम असल्याने विशिष्ट उपक्रम हाती घेण्याबाबत विचार कराल. व्यवसायिकांचा सरकारी यंत्रणांशी संबध येणे क्रमप्राप्त असेल. सरकार दरबारी तुमची प्रकरणे मंदगतीने सरकतील. तुमच्या कामात स्त्री सहकार्‍याची मोठी मदत होईल. जाहिरात किंवा अन्य कलात्मक व्यवसाय यामध्ये अपेक्षित उलाढाल होईल. कठिण प्रसंगात मनाच्या अगाध शक्तीचा प्रत्यय येईल. साताहांती कला क्षेत्रात वैशिष्ट्यपूर्ण कलाकृती सदर कराल.

 

धनु-आर्थिक प्रगतीच्या नव्या संधी

 

व्यावसायिकांना आर्थिक प्रगतीच्या नव्या संधी मिळतील. नोकरदारांना उद्दिष्टपूर्तीचा आनंद लाभेल. आर्थिक उन्नतीच्या दृष्टीने आपली गुंतवणूक योग्य असल्याची खात्री करून घ्या. विपरीत निर्णय आणि अविचारी कृती तुमच्या अडचणी वाढवू शकते. आरोग्य रक्षणार्थ काळजी घेणे आवश्यक आहे. कुटुंब स्वास्थ्यासाठी आप्तेष्टांशी संवाद साधणे आवश्यक आहे. उत्तरार्धात मानसिक ताण वाढविणार्‍या घटना घडण्याची शक्यता आहे. सप्ताहांती उत्तम स्मरणशक्तीच्या सहाय्याने हातून वैशिष्ट्यपूर्ण कार्य घडेल.

 

मकर-जबाबदार्‍या कार्यक्षमतेने पार पाडाल

 

गुरु,शुक्र आणि शनी या तीनही महत्वाच्या ग्रहांची अनुकूलता चित्तवृत्ती प्रसन्न ठेवतील. हसतमुख राहून स्वतःच्या जबाबदार्‍या पूर्ण कार्यक्षमतेने तुम्ही पार पाडू शकाल. विवाहसौख्याची पातळी उच्चतम राहील. नोकरी आणि उद्योगात वाढते अधिकार वाढत्या जबाबदार्‍या देणारे राहतील. प्रयत्नाने आणि आत्मविश्वासाने कर्तृत्वाचे प्रत्येक पाउल पुढे टाकाल. उत्तरार्धातील  परोपकाराचा प्रसंग मनःशांती देणारा असेल. सप्ताहाच्या शेवटी तात्कालिक भावानोद्रेकाने पतीपत्नीत ताण तणाव निर्माण होऊ शकतात.

 

कुंभ- कौटुंबिक सुख आणि समाधान 

 

नोकरी आणि व्यवसायातील प्रयत्नात यशाचे प्रमाण मर्यादित राहील. दैनंदिन कामात अडचणींना तोंड द्यावे लागेल. विरोधकांवर तुमचे नियंत्रण राहिले तरी त्यांच्या कारवायांमुळे आर्थिक नुकसान सोसावे लागण्याची शक्यता आहे. कौटुंबिक आघाडीवर सुख आणि समाधान राहील. कला, डिझाईन आणि लेखन अशा क्षेत्रात सरस कलाकृतीच्या निर्मितीची शक्यता आहे. उतरार्ध भावनाप्रधान प्रसंगांचा असेल तर सप्ताहाचा शेवट मनाच्या सामर्थ्याची अनुभूती देणारा राहील. विसरभोळे पणाने नुकसान होऊ शकते.

 

मीन-कला जोपासण्याचा आनंद

 

कौटुंबिक जीवन सुखाचे आणि आनंदाचे राहील. संततीविषयक उपक्रमांना अडचणी आणि अपयशाचा सामना करावा लागेल. आपल्या मुलामुलींच्या आरोग्याबाबत जागरुकता ठेवा. धार्मिक कारणांसाठी खर्च कराल. कला किंवा छंद जोपासण्याचा आनंद घ्याल. महिला सौंदर्य वृद्धीच्या उपक्रमात दंग राहतील. व्यवहारातील वचन भंगाच्या अनुभवाने मनस्ताप होण्याची शक्यता आहे. फसवणूक टाळण्यासाठी अनावश्यक व्यवहार किंवा गुंतवणूक टाळा. सप्ताहाच्या शेवटी भावनाप्रधानता ही सध्याची कमजोरी ठरेल.