News - Daily Kesari

पुण्यात गॅस सिलेंडरचा भीषण स्फोट

Samruddhi Dhayagude
09 Apr 2025

दोघांचा होरपळून मृत्यू

पुणे : पुण्यात गॅस सिलेंडरचा भीषण स्फोट झाला. वारजे येथील माळवाडी, सर्वे नंबर ५२ गोकुळ नगर इथे एका पत्र्याच्या घरात मंगळवारी मध्यरात्री सिलेंडरचा भीषण स्फोट झाला. ९ एप्रिल रोजी, मंगळवारी १ वाजून ५६ मिनिटांनी सिलेंडरचा स्फोट झाला. या स्फोटात दोन जणांचा होरपळून दुर्दैवी मृत्यू झाला.

या आगीची माहिती मिळताच घटनास्थळी अग्निशमन दल दाखल झाले. स्फोट झाल्यानंतर आगीने रौद्र रूप धारण केले. अग्निशमन दलाने तात्काळ घटनास्थळी दाखल होत सिलेंडरच्या स्फोटात लागलेली आग विझवण्याचे काम सुरू केले. अग्निशमन दलाच्या जवानांनी पाण्याचा मारा करत गॅस सिलेंडरच्या स्फोटात लागलेली आग विझवली. यावेळी घरामध्ये दोन पुरुष जखमी अवस्थेत आढळले. त्या दोन जखमी व्यक्तींना पोलिसांच्या मदतीने रुग्णवाहिकेतून तात्काळ रुग्णालयात दाखल केले. ससून येथे रवाना केलेल्या जखमींची नावे मोहन माणिक चव्हाण (वय वर्षे ४३), अतिश मोहन चव्हाण, (वय वर्षे २५) आहेत.

गॅस सिलेंडरच्या स्फोटात संपूर्ण घर उद्धवस्त

वारजे मधील पत्र्याच्या घरात झालेला सिलेंडरचा स्फोट इतका भीषण होता की, सिलेंडरचे सर्व भाग वेगळे झाले. सिलेंडरची वरची रिंगदेखील सिलेंडरपासून वेगळी होत उडाली. सिलेंडर पाच-सहा भागात फुटला असून या स्फोटात घरातील सर्व भांडी, इतर सामान, संपूर्ण घर उद्धवस्त झाले. संपूर्ण घरात वस्तू उडून, त्या फुटल्या असून सामानाची राख रांगोळी झाली आहे. सिलेंडरच्या स्फोटात गॅसदेखील पूर्णपणे फुटला असून त्याचे विविध भागात तुकडे झाले आहेत. पत्र्यांचे बांधकाम असलेल्या घराचे पत्रे पूर्णपणे उडाले आहेत.

या घटनेने परिसरात मोठी खळबळ उडाली आहे. या स्फोटाचे कारण अद्याप समजलेले नाही. मात्र पोलीस घटनास्थळी पोहोचून सिलेंडरचा स्फोट नेमका कसा झाला, आगीच्या कारणाचा तपास केला जात आहे. या स्फोटात दोघांचा मृत्यू झाल्याने परिसरात हळहळ व्यक्त होत आहे.