News - Daily Kesari

कृषी पणन मंडळाकडून आंबा महोत्सव

Samruddhi Dhayagude
31 Mar 2025

पुणे : आंबा विक्री व्यवस्थेमधील मध्यस्थ वगळून शेतकर्‍यांना बाजारभाव व ग्राहकांना रास्त दरात चांगल्या गुणवत्तेचा आंबा मिळावा या उद्देशाने उत्पादक ते थेट ग्राहक संकल्पनेनुसार महाराष्ट्र राज्य कृषी पणन मंडळामार्फत पुण्यात चार ठिकाणी १ एप्रिल ते ३१ मे २०२५ या कालावधीत आंबा महोत्सवाचे आयोजन करण्यात आले आहे.

राज्यातील आंबा उत्पादकांना थेट विक्री करता यावी, यासाठी पुण्यासह राज्यांच्या विविध भागात आंबा महोत्सवाचे आयोजन करण्याच्या सूचना पणनमंत्री जयकुमार रावल यांनी दिल्याचे कृषी पणन कार्यकारी संचालक संजय कदम यांनी सांगितले. या महोत्सवासाठी रत्नागिरी, सिंधूदुर्ग, रायगड, पालघर आणि ठाणे या कोकणातील पाच जिल्ह्यांतील हापूस आंबा तसेच राज्यातील केशर, पायरी, तसेच इतर वाणांचा आंबा उपलब्ध होणार आहे.

कोकणातील हापूसच्या नावावर परराज्यातून आलेल्या आंब्याची सर्रास विक्री होते. त्यामुळे कोकणच्या हापूसचे नाव बदनाम होत आहे. मात्र, आता जीआय मानांकनामुळे हापूसच्या नावे होणारी फसवणूक टाळली जाणार आहे. ही बाब विचारात घेऊन पणन मंडळामार्फत आयोजित आंबा महोत्सवात देखील जीआय मानांकन प्राप्त झालेल्या शेतकर्‍यांचा समावेश करण्याचा निर्णय घेण्यात आल्याचे कदम यांनी सांगितले.

पुण्यातील आंबा महोत्सव मार्केट यार्ड परिसरातील जिल्हा परिषदेच्या जागेवर ६० स्टॉल, गांधी भवन (कोथरुड), मगरपट्टा (हडपसर) आणि खराडी येते प्रत्येकी २० असे ६० स्टॉलद्वारे आंब्याची विक्री करण्यात आली आहे. यामुळे शहराच्या विविध भागांतील ग्राहकांची सोय होणार आहे. दरम्यान, कोकणातील हापूस आंब्याबरोबरच राज्याच्या विविध भागातील केशर आंब्याचा लाभ ग्राहकांनी अवश्य घ्यावा, असे आवाहन पणन मंडळाचे सरव्यवस्थापक विनायक कोकरे यांनी केले आहे.