ब्रेकिंग

महाराष्ट्र

निवृत्तीच्या विषयावर सकाळच्या भोंग्याने बोलू नये

Wrutuja pandharpure
02 Apr 2025

मुंबई, (प्रतिनिधी) : पंतप्रधान नरेंद्र मोदी यांचा उत्तराधिकारी महाराष्ट्रातून असेल आणि तो संघ ठरवेल, असे विधान शिवसेना ठाकरे गटाचे नेते खासदार संजय राऊत यांनी केले होते. याला प्रत्युत्तर देताना महसूलमंत्री व भाजप प्रदेशाध्यक्ष चंद्रशेखर बावनकुळे यांनी संजय राऊत यांच्यावर टीका केली. भारतीय लोकशाहीत पंतप्रधानांनी कधी निवृत्त व्हायचे, हे राऊत यांच्यासारख्या सकाळच्या भोंग्यावर ठरत नाही, तर जनादेशावर आणि लोकांच्या आशीर्वादावर ठरते, असा टोला त्यांनी लगावला.

राऊत यांचे विधान ही केवळ राजकीय स्टंटबाजी आहे. ७५ वर्षे वयानंतर पंतप्रधान मोदी यांनी राजकारण सोडावे, असा कोणताही नियम नाही किंवा असा कुठलाही निर्णय झालेला नाही. भाजपच्या कोणत्याही अधिकृत धोरणातही, असे म्हटलेले नाही. भारतीय राज्यघटनेतही असा कोणताही ठराव किंवा नियम नाही. भाजपचे नेते अटलबिहारी वाजपेयी वयाच्या ७९ वर्षांपर्यंत पंतप्रधान होते. तर मोरारजी देसाई (८३ वर्षे) आणि डॉ. मनमोहन सिंग तर वयाच्या ८१ वर्षांपर्यंत पंतप्रधान होते. पण, मानसिक संतुलन बिघडल्याने भाजप द्वेषाची कावीळ झालेल्या राऊत यांना हे आठवणार नाही, असेही ते म्हणाले.२०४७ पर्यंत विकसित भारत करण्याचा संकल्प पंतप्रधान मोदी यांनी केला आहे. हा संकल्प त्यांच्याच नेतृत्वात पूर्ण केला जाईल, असा विश्वास बावनकुळे यांनी व्यक्त केला.