ब्रेकिंग

कृषी उत्पादन निर्यात वाढीच्या दृष्टीने आराखडा तयार करा : जिल्हाधिकारी

Wrutuja pandharpure
07 Mar 2025

पुणे : जिल्ह्यात कृषी उत्पादन निर्यात वाढीच्या दृष्टीन पीकनिहाय क्लस्टर तयार करून विविध शासकीय योजनांच्या अभिसरणाच्या माध्यमांतून नियोजन करून आराखडा तयार करावा, अशी सूचना जिल्हाधिकारी जितेंद्र डुडी यांची कृषीविषयक योजनांच्या अंमलबजावणी व नियोजनाबाबत आढावा बैठकीत दिली.यावेळी जिल्हा अधीक्षक कृषी अधिकारी संजय काचाळे, कृषी विभागाचे क्षेत्रीय अधिकारी, प्रकल्प संचालक आत्मा, कृषी विज्ञान केंद्र, कृषी विद्यापीठ, विविध कृषी संशोधन केंद्र, यांचे प्रतिनिधी, जिल्ह्यातील प्रगतीशील शेतकरी व कृषी निर्यातदार आदि उपस्थित होते.

या बैठकीत फलोत्पादन पिकामधील क्षेत्र वाढ, नैसर्गिक व सेंद्रीय शेतीखालील क्षेत्रात वाढ करणे, शेतमालाच्या निर्यातीमध्ये वाढ करणे आदि बाबींवर चर्चा करण्यात आली. तसेच जिल्ह्यातील केळी, ऊस, द्राक्ष, डाळिंब, आंबा, तेलबिया, कडधान्य, तृणधान्य उत्पादक शेतकर्‍यांनी उत्पादकता वाढ निर्यातवृद्धी संदर्भात येणार्‍या अडचणी शासनांकडून आवश्यक असणारी मदत याबाबत मुद्यांवर चर्चा करण्यात आली.ऊस हे जिल्ह्यातील प्रमुख पीक आहे. उसातील पाचट व्यवस्थापन, सुक्ष्म सिंचन बेणे यावर भर देण्याची आवश्यकता असल्याचे वसंतदादा शुगर इन्स्टिट्यूटच्या प्रतिनिधींनी सांगितले. फळपिकांच्या बाबतीत यांत्रिकीकरण, सूक्ष्म सिंचन, नवीन वाणांचा वापर, शीतगृह सुविधा आवश्यक असल्याचे फलोत्पादक शेतकर्‍यांनी सांगितले.