ब्रेकिंग

गुन्हेगारी जगत

फरारी दाम्पत्यांविरूध्द अटक वॉरंट

Wrutuja pandharpure
07 Mar 2025

आमिष दाखवून १२५ कोटींची फसवणूक

पुणे : शेअर बाजारात गुंतवणुकीच्या आमिषाने गुंतवणूकदारांची तब्बल १२५ कोटी रुपयांची फसवणूक केल्यानंतर दुबईला फरारी झालेल्या आरोपी पती-पत्नी दाम्पत्यांविरूध्द शिवाजीनगर न्यायालयाने अजामीनपात्र अटक वॉरंट बजाविले आहे. राठोड दाम्पत्याने सहाशेहून अधिक गुंतवणूकदारांची आर्थिक फसवणूक केल्याचे पोलीस तपासात उघडकीस झाले आहे.

अविनाश राठोेड आणि विशाखा राठोड, अशी दाम्पत्यांची नावे आहेत. राठोड दाम्पत्याविरुद्ध २० एप्रिल २०२३ रोजी चतु:शृंगी पोलीस ठाण्यात गुन्हा दाखल करण्यात आला होता. याबाबत डॉ. जगदीश जाधव यांनी फिर्याद दिली आहे. प्राथमिक तपासात दाम्पत्याने दहा जणांची १६ कोटी रुपयांची फसवणूक केली होती. फसवणुकीची व्याप्ती वाढल्यानंतर या प्रकरणाचा तपास पुणे पोलिसांच्या आर्थिक गुन्हे शाखेकडे सोपविण्याचे आदेश पोलीस आयुक्त अमितेश कुमार यांनी दिले होते. आतापर्यंत या प्रकरणात पोलिसांनी ५१ गुंतवणूकदारांचे जबाब नोंदविले आहे. पोलिसांच्या तपासादरम्यान राठोड दाम्पत्य दुबईला फरारी झाल्याचे उघडकीस आले.

राठोड दाम्पत्याने ‘एपीएस वेल्थ व्हेंचर एलएलपी’ या नावाची कंपनी सुरू केली होती. कंपनीच्या माध्यमातून शेअर बाजारात गुंतवणुकीचे आमिष दाखविले होते. राठोड दाम्पत्य फरारी झाल्यानंतर रेड कॉर्नर नोटीस बजाविण्याची प्रक्रिया सुरू करण्यात आली आहे. दोघांना ताब्यात घेण्यासाठी इंटरपोलची मदत घेण्यात येणार आहे. या प्रकरणात पोलिसांकडून आरोपींविरुद्ध न्यायालयात लवकरच आरोपपत्र दाखल करण्यात येणार आहे.